Z’Hansrüedi
Z’Hansrüedi
Z`Hansrüedi biographie nius miini lieder üftritta repertoir
zeedees bschtellig links ambrichaladu i-meil heim

Z'Hansrüedi'sch News

 
10. November 2015

Sooo äs funktioniert tatsächlich! Numma sumi Datije chani immer no nit ubernäh.

Bivor das alles üsgibüecht ischt, machi no churz Reklaam fer d'Flussfahrt im Oktober 2016: Programm: Am Frontag, 6.10. mit dum Bus uf Colmar ga z'Mittagässu und de witer bis uf Strassburg und de geits uf ds Schiff! Am Maabu gits de Müsig.

Am Fritag gäh wer in die Drosselgasse uf Rüdesheim und de weiter uf Koblänz. Am Maabu gibts de es Fäschtji...

Am Samstag si wer in Cochem an der Mosel. ...und will Wuchunänd isch, gits öi an dem Aabu es Fäscht!

Am Sunntag si wer de in Saarburg und am Maabu chenne wier de d'Abschiedsparty gniessu.

Am Mäntag fahre wer de va Saarbrücken zrugg in d'Schwiz....

Fer witeri Üskinft: Bruno Hostettler, Bürchen alittu: 079 / 598 39 14



10. November 2015

Hoffuntli funktioniert jetz ändli die Igab fer miini Nius - Ich hetti soooo vill z'schriibu....

Mal probieru....



10. November 2013

En ganzi Wucha sii wier ds Rom gsii und hei da unner annerum öi fer d'Schwizergardischtu im Vatikan derfu spilu! Dr Walter Keller und ich hei iisch immer flott abgwägslut und hei sogar es Gardischtu-Lied zämu gschribu. Dascht appa der Startschuss gsii zu miiner niww CD, wani de am 3. Oktober 2014 ds Fieschertal will töifu. Ds Datum ischt scho lang fix - und ich hä no kies einzige Lied bireit...

Üsserdem gits ja im Oktober no die "Wallisermüsigjubiläumswanderwucha" (WMJWW) ds Fieschertal. Mu cha schich no amäldu.



Herrgottstag, 30. Mai 2013

Ich bi Walliser!

Jetzt sogar uf dum Papier!! Die Burger va Natersch heint mich zum Ehruburger gemacht und hittu isch der Burgertrüüch im Zentrum Missione gsii! Dr Jonas Zenhäusern het in schiiner Laudatio mit dum Lied "Ehruburgerli" (Müeterli) en richtige Hit glandut!

Züedem hei wier no die niww CD "Natersch,miis Derfji" gitöift. Alli Burger und Burgerinne va Natersch sind jetzt Töifgetti va dr CD.

...nam Kulturpriis verchumm ich jetzt öi no dr Ehruburger...

Hä eifach en hüeru Freid!!!



1. Februar 2013

Der Januar ischt scho durch und ich hä wieder es paar uhammer schööni Momänt derfu erläbu. Ds Konzärt mit de ENDFRENZ bi dr Häxu-Abfahrt het gfägt - so wie immer! Und jetzt chunnt de d'Fasnachtszit mit de Üfheeru!! Ds genau Üftrittsprogramm kascht naaläsu unner www.üfheeru.ch. Und de gits no ds Konzärt mit de Lüüsbüebu iner Länk. Und so witer....



1. Januar 2013

Jetzt bin ich Kulturpriisträger va dr Gmeind Natersch!! Bim Neujahrsempfang het mu mier der Priis ubergäh! Hetti nie gideicht, dass mini Arbeit emal esoo geschätzt wird. Eifach wunderschön!!!

Der Kulturpreis verchunnt natiirli en Ehruplatz in miiner Wohnig!!

Vergältsgottvilltüüsigmal!!



Mittwoch, 31. Oktober 2012 CD-Taufe "Gondo"

Hie ds Programm va dr CD-Töifi / Dorffäscht in Gondo:

Mittwoch, 21. November 2012

14.00 h: - Apéro der Gemeinde Gondo beim Stockalperturm

15.00 h: - Vorstellung der CD " Gondo" - Kurzvortrag über Gondo - CD -Taufe (Marie Tscherrig / Roland Squaratti)

17.00 h: - Ende des offiziellen Teils

18.00 h: - Dorffest mit Z'Hansrüedi in der Turnhalle

23.00 h: Extrabus Gondo - Brig



Ziischtag, 23. Oktober 2012 Seine-Flussfahrt

D'Seine-Flussfahrt va Paris uf Honfleur ischt herrlich gsii! Uhammer schwein mit dum Wätter, die beschtu Gäscht wa mu schich numma cha vorstellu (äs sind Fahnuschwinger us dr ganz Schwiz derbii gsii!!) und en Super-Organisation durch ds Karin und du Bruno! Das ischt en würdigi, letschti Flussreis gsii! ...und miini Zeedee "Gondo" häni öi no chennu vorstellu uf dum Schiff!! Öi weni jetz gottschgrüüsig vercheltut bi... s'isch schööön gsii!



Dunnschtag, 28. Juni 2012 - Niwwi Zeedee

Hä geschter es längers Gschpräch kä mit dum Gmeindpräsidänt va Gondo - dum Roland Squaratti. ...und jetz is definitiv: Wier produziere zämu en niwwi Zeedee mit dum Namu "Gondo". Das heisst: Va jetz awäg wird wieder gitegschtut, komponiert, Sitzige mim Audi (inkl. Kaffee). Wenn alls güet geit isch die Zeedee Afangsch Dezämber fertig. Wääri hüeru güet!!



Freitag, 20. Januar 2012 - Üfheeru!! Wier trätte üf!

Iischi Schnitzelbankgruppa "Üfheeru!!" trättut trotz dum Tod va miinum Brüeder Erich diz Jahr üf!! Dr Erich hettisus sicher e so wellu....

Ds genau Üftrittsprogramm chamu naaläsu uf www.uefheeru.ch



Mittwoch, 12. Oktober 2011 - Nius vam Oktober 2011

Vor zimmli genau einum Jahr ischt 'z'letscht Fäscht' gsii. Derdussunt het schich in miinum Läbu sehr vill verändrut:

  • D'Karin und ich hei d'ganzi Wält gseh! Iischers 'Täimaut' ischt fantastisch gsii und wier sii beidi gsund zrugg cho!
  • Miini Stimmbänder heint schich sogar ohni Operation chennu erholu und ich cha wieder singu!
  • Ich trättu jetz wieder üf bi Hochzite, Giburtstäg und annre chleineru, internu Aläss.
  • Die Präsenzzit pro Üftritt häni limitiert uf füüf Stunde. Meh müet ich miini Stimmbänder nimme züe!
  • Die Bänd 'ENDFRENZ' (Audi, Speedy, Björn, Ephri, Ralph, Chiara und Angie) het schich im Wallis richtig chennu etablieru! Wier hei scho uhammer schööni Üftritt kä (z.B. Openair Gampel).
  • Öi die Bänd 'Lüüsbüebu' ischt gfrägt wie no nie und macht en uhammer Freid!
  • Alleinzig üfträttu an greberu öffentlichu Üftritta tüeni vorlöifig nimme - wenigschtens solang wier mit de Bänds no welle Üftritta machu!

Was schich nit verändrut het: Ich hä immer no en uhammer Freid an jedum einzelnu Üftritt - öi wenn ich nimme so Vollgas cha gäh wie freiner..

Und zletscht no gat eppis ganz Wichtigs: Ich häs wellu probieru - aber ohni Müsig geits nit!!

Gfrewwu mich uf d'neegschtu Üftritta!!



Ziischtag, 03. Mai 2011 - Bi wieder zrugg!!

D'Wältreis isch durch! ...und ich hettisus no es paar Monat uf dr MS Ditschland üsghaaltu! So mit der Zit gwennt mu schich nämmli an das "Dolce far niente" - oder wie das heisst.... Und wie geits witer??

In de neegschtu paar Monat entscheidut schich ob d'Stimmbänder schich wirkli heint chennu erholu. Ich probieru afa mal einzulni chleini Üftritta. An gressere Aläss spill ich ja sowieso nimme...



Samstag, 20. November 2010 - Juhuui!!

Dischi Mitteilig ischt eifach en Itrag bi de Nius wäärt: D'Stimmbänder wärdunt jetz doch nit operiert!! Ich probieru jetzt aner Wältreis keis einzigs lüts Wortji z'redu. Chunnt güet!! :-)



Montag, 25. Oktober 2010 - Z'letscht Fäscht

Z'letscht Fäscht isch durch - ich bi tilt - aber uberglicklich! Zweimal isch ds Zentrum Missione üsverchöift gsii - wills kei Vorverchöif gä hett sind d'Lit bis zum Märtplatz agstandu und die Konzärti mit de Bitschifäzzer, de Lüüsbüebu und de ENDFRENZ sind eifach genial gsii. Allne wa derbii sind gsii chani nummu eppis sägu: Vergältsgottvilltüüsigmal!!! Das isch ds Allergreegschta wa en Müsiker darf erläbu. Fer das richtig ds Biarbeitu, geits appa es schutzji.

Und va jetz awäg kehrt mu va mier appa es schutzji nix meh...



Donnerstag, 30. September 2010 - Nius vam Oktober 2010

Wan ich mich im Niinuninzgi entschidu hä, Ändi Oktober Zweitüüsigundzäh üfzheeru, häni gmeint, das gäge non Ewigkeit - und jetz isch die 'Ewigkeit' scho verbii...

In drii Wuche isch Z'Hansrüedi (esoo wie mu mich hittu kennt) Verganguheit. Im Fäschtbüechji chascht genau naaläsu was naa dum letschtu Fäscht no alls löift.

Chämer wer zu eppis Erfröilichum: Miini niww Zeedee "Soderso" ischt fertig! Fer mich is die beschti Produktion wani jemals gmacht hä! Bschtellu chamu schi bi mier - oder öi uber ds Internet.

...und jetz müessi glii no en chleini Bimerkig uber "z'letscht Fäscht" machu. Das git es tüpischus Walliser-Fäscht - das heisst: Fascht kei Sitzplätz - d'Walliser bliibunt bim fäschtu lieber stah. Ehrlich gseit hettis ich lieber annersch kä, aber Zooka het sus soo wellu hä. Alls annra chasch im Fäschtbüechji naaläsu...

Eso zum Abschluss wellti ich dier und allne dene, wa miini Nius immer gläsu heint va ganzum Härzu merci sägu! Dank eww allne zämu hän ich e sooo lang vor soooo güetum Publikum derfu üfträttu. Äs macht richtig weh, dass alles üfzgäh - aber ich müess eifach (gsundheitshalber) es bizji chirzer trättu...

En wunderschööne Abschnitt va miinum Läbu hän ich dank eww derfu erläbu! Vergältsgottvilltüüsigmal!

Mal lotzu was d'Züekunft no alls bringt...



Freitag, 12. März 2010 - Nius vam März 2010

Äs rickt - s'geit gar nimme so lang bis zu miinum Abschlusskonzärt im Oktober... Einersits tüets mer uhammer weh, dass das jetz scho bald sowit ischt - aber annrersits gfreww ich mich wie es chleis Jingi uf die Zit wani de mit dr Karin darf verbringu. (...wier zwei gäh fer längri Zit in d'Ferie - aber bitte nit witersägu...). Aber zeerscht springe wer no voller Freid de räschtlichu Üftritta und miiner Wienächtszeedee a.

Wienächtu ischt zwar eerscht im Dezämber - aber hittu gseht mu scho sooo früeh dekorierti Gschäfti, dass ich jetz no gat eine drufsetzu: En Wienächts-Zeedee im Mai! Kei Angscht, mier hets nit üsgheicht und ich bi öi nit tschugg, dass ich so en Produktion scho im Üstag uf du Märt kiiju. Äs het en andre Grund: Zu miinum Abschlusskonzärt ischt en 'normaali Zeedee' giplaant - und de gääbis zwei ganz verschieduni Tonträger gat vill z'nooch ufenand. Üsserdem het no nie epper im Mai en Wienächts-Zeedee üssagigäh...

Jetz no gat es paar Wort zu miinum Abschlusskonzärt: Äs git kei Vorverchöif!! Ich machu öi kei Hotelreservatione! Und jetzu ds Beschta: Ich organisieru das öi nit sälber!! Äs git es speziells OK fer ds Abschlussfäscht. Äs sind villi Sache giplaanti - aber uf die gahni jetz gat äxtra nit i - das würdi der Rahmu va dischum Brief sprängu. Numma eis wichtigs Datum: Ab dum 1. Mai 2010 chamu uf der Houmpeitsch www.zhansruedi.ch alls alüegu und ambrichaladu was wichtig ischt!

Ob und wies dernaa witergeit, weiss ich sälber no nit ganz sicher. Frieschtens ab Mitte Mai z'neegscht Jahr wellti eiguntli scho wieder gääru es bizji Müsig machu - aber ganz sicher nimme soo wie bis jetzt. Ich müess mier und miine Stimmbänder schins es bizji meh Sorg hä und darum spill ich de nimme d'ganzi Nacht durch wie bis jetz. Villiichter angaschiert mu mich ja trotzdem no hientamal.... Uf miiner Houmpeitsch www.zhansruedi.ch chamu so ab Mitti Summer genau naaläsu, mit was fer Ischränkige mu bi de züekünftigu Üftritta müess rächnu.

Aber äbu: Schich jetz scho Gidanke machu was villiichter no alls chunnt isch nit miini Art! Gniesse wer doch zämu die Zit bis zum Oktober und lüege dernaa witer.

Ich gfrewwu mich uf d'Üftritta, uf die niwwu Zeedees, uf ds Publikum und sogar uf miis Abschlussfäscht im Oktober!



Ziischtag, 01. September 2009 - Nius vam Septämber 2009

Der Summer isch glöibi durch - und ich hä mer immer gseit, dasi va jetz awäg sus es bizji gmietlicher nimu. Aber äs ischt wieder eine va de schtrengschtu - aber öi eine va de schönschtu Summer gsii in miinum Läbu. Hä uhammer schööni Üftritta käh! Zum Biischpill am Openair ds Gampel, an villne Gartufäschti und natiirli nit vergässu wellti die ganzu Hochzitsfäschti oder Giburtstagsfäschti wani hä derfu derbii sii. Müsig derfu machu ischt immer no ds Schönschta was git - und de darfs hientamal scho es bizji sträng sii...

Öi ds Jodlerfäscht hie ds Natersch und alles wa da derzüe keert, het mi zimmli gschlüücht! Bsunders dr Ändspurt fer d'Fertigschtellig va dr Fahnuschwinger-DVD hetsus in schich käh!

Apropos DVD: Die Fahnuschwinger-DVD wird nit ganz zu Unrächt als Jahrhundertwärch fer iisch Fahnuschwinger aglüegt. Wenn schich epper fer iischers Brüüchtum sellti intressieru und villiichter sogar sälber das Spill mit dr Fahnu wellti leeru, dem chani die DVD numma empfählu! Mu cha schi diräkt bi mier bschtellu. ABER OBACHT!! Die Fahnuschwinger-DVD het absolut nix mit miiner Müsig z'tüe! Nit z'letscht wägu der DVD bini nit derzüe cho, anera niwwu Zeedee umenanderzbaschtlu. Aber kei Angscht: Bivor dasi im Oktober ds neegscht Jahr üfheeru gits sicher no eini. Schliessli häni wieder es paar güeti Ideeje fer niwwi Lieder, aber wie gseit: Ich wellti ja nimme so stressu...

Wient uf dr Üftrittsliischta chascht gseh wartunt wieder es paar 'Häiläiz' in neegschter Zit uf mich - obwohl fascht jede Üftritt fer mich es 'Häiläit' ischt. Üsserdem probier ich miini Üftritta so izteilu, dass ich schi immer no mit Vollgas mag gschüenu - schliessli bini keis Hirhasi meh.

Fer dizmal häni wieder gnüeg gschribu. Es Vergältsgottvilltüüsigmal an allne zämu, wa mich immer so fantastisch tient unnerstitzu! E so is uhammer schöön derfu Müsig z'machu!



Sonntag, 29. März 2009 - Nius vam April 2009

Hetti nie gideicht, dass die Zit e soo schnäll cha vergaa...

Mich het gidüücht ich heige doch eerscht vor eme Monat d'letschtu Nius verschickt und d'letscht Wucha verchumi d'Mitteilig, dass miini Üftrittsliischta scho wieder veraaltut siige. Äs ischt scho e so: Je meh dass passiert umso schnäller vergeit die Zit...

Und äs ischt vill passiert ine letschtu Monati: Vill Üftritta im In- und Üsland, bi no in de Ferie gsii, vill Vorbereitigsarbeite fer ds Jodlerfäscht hie ds Natersch und öi fer iischi Fahnuschwinger-DVD. Natiirli darfi hie öi d'Fasnacht nit vergässu! Wier hei mit iischer Gruppa 'Üfheeru!!' uhammer schööni Üftritta derfu erläbu! Freid und Leid liggunt hienta ganz nooch zämu. Am Giigimäntag (Rosenmontag) het miine Brüeder Landi bime Autounfall schiis Läbu verlooru. Allne wa iischer Famili in der schwär Zit biigschtandu sind, wellti öi hie es groossus 'Vergältsgottvilltüüsigmal' sägu. Trotz allum: Ds Läbu müess witergah und bim Müsigmachu cha mu en hüüfu Sorge vergässu...

Mu gsehts an miiner Üftrittsliischta: Längwiilig wirds mier ganz sicher nit! Züedem häni diz Jahr sehr villi interni Angaschma bi Giburtstäg, Hochzite oder Firmufäschti.

Im Juni isch de fer iisch Fahnuschwinger wieder Jodlerfäschtzit! Zeerscht gäh wer uf Gstaad (12. - 14. Juni), de uf Natersch (19. - 21. Juni) und zletscht no uf Dagmersellu (26. - 28. Juni). Bsunders uf Natersch gfreww ich mich wie es chleis Jingi. Ich hälfu da öi es bizji bim Organisieru und an dem Fäscht wird de ändlich die Fahnuschwinger-DVD veröffentlicht. Ich hä in de letschtu füüf Jahr sehr vill Zit und Härzblüet in das Projekt inveschtiert und ich bi richtig glicklich, dass die DVD üsgrächnut an 'miinum' Jodlerfäscht in Natersch gitöift wird! Am Fritag, 19. Juni 2009 am Maabu am Achti uf dum Chirchuplatz! Übrigens cha mu de die DVD (Fr. 30.-) dernaa öi bi mier bschtellu. Apropos bschtellu:Uf miiner Houmpeitsch cha mu sit Niwwschtum öi ganz spezielli Walliser-Produkti chöifu: Hosuträger und Brille. Aber äs het numma solang das hett...

Fer dizmal häni appa wieder gnüeg gschribu! Ich wiischu allne en sunnige Früelig, en heisse Summer und dass wier iisch gsund widergseh bi einum va miine neegschtu Üftritta.



Mittwoch, 05. November 2008 - Nius vam Novämber 2008

Eiguntli häni ja diz Jahr kei Nius meh wellu züeschicku - aber äs ischt äbu zimmli vill passiert in letschter Zit und äs löift no vill meh in neegschter Zit.

Naa dum 'ENDFRENZ'-Konzärt in Gräächu heintsch mich uberall gfrägt, wenn wier z'neegschtmal zämu spile. Ier chennetsmer glöibu: Äs ischt uhammer schwär, die Müsiker fer es Konzärt uf die Bühni z'bringu. D'einzig Meglichkeit: D'Wucha durch. Aber wer angaschiert 'ENDFRENZ scho fer d'Wucha durch eswa ga z'spilu? Also hei ds Audi und ich sälber eppis organisiert: Z'Hansrüedi ENDFRENZ Wörld-(Tor)Tuur. Wier gäbe drii Konzärt im Oberwallis. Und derbii mäche wier appa alles falsch wa mu cha falsch machu: 1. D'Wucha durch, 2. Nit eso in de Zentre, 3. Gägu Ändi Novämber wa mu lieber deheimu blibt. Aber eis ischt sicher: D'Müsiker uf der Bühni heint so oder so en uhammer Freid am müsizieru - öi wenn fascht niemer zu dene Üftritta sellti cho. Aber wier hoffe immer no, dass wenigschtens d'Uncheschte gideckti sind. Und z'neegscht 'ENDFRENZ'-Konzärt ischt ja eerscht am 22. Oktober 2010 giplaant...

Ich hä öi zämu mit de Lüüsbüebu iner Simplonhalla derfu üfträttu. So vill Lit hets am Caracas am Fritag no gar nie kä! Die Gruppa 'A.F.' und ich hei z'Vorprogramm gmacht und de is mit de Lüüsbüebu losgangu. Wennt willt wissu was abgangu ischt: www.lüüsbüebu.ch.

Z'Hansrüedi'sch Ööschtriicher-Reis ischt en volle Erfolg gsii. Ich wellti an discher Stell allne danku wa fer die güet Stimmig gsorgt heint! Het wirkli Freid gmacht - öi wenn d'Karin no hittu unner de Naawirkige z'liidu het. Und ich sägus hie nomal: Das ischt wirkli miini letscht organisiert Z'Hansrüedi-Reis gsii.

Uf der Ööschtriicher-Reis häni öi en niwwi Zeedee vorgschtellt. D'Lieder sind zwar nit niww - aber so en volkstümlichi (!) Produktion häni no nie gmacht. Schii heissut öi 'Hudigääggeler' - und genau so teent schii öi. Ich bi ganz sicher, dass de meischtu Lit die Müsig sau güet wird gfallu. Am 20. Novämber wird die Zeedee im Zentrum Missione ds Natersch gitöift. Gat vor dum Abschlusskonzärt va der ENDFRENZ-Wörld-(Tor)Tuur. Die Priska als Töifgotta, der Hansjörg als Töifgetti und ich als Interpret hetti en uhammer Freid, wenn vill Lit würdi cho. Am Donnschtag, 20.11.08 ins Zentrum Missione uf Natersch.

Häbet alli zämu en churzwiiligi Adväntszit, wunderschööni Fäschttäg und en luschtige Rutsch ins Nullniini!



Samstag, 02. August 2008 - Nius vam Öigschtu

Was in letschter Zit hie im Wallis abgangu ischt, hetti ich nie fer megli ghaltu. Immer wenn ich hie eswa öffentlich spilu, ischt alles bumsvoll und bsunders die jungu Lit singunt alli miini Lieder mier vor und naa. Bsunners der Üftritt ds Gräächu zämu mit de ENDFRENZ ischt eifach genial gsii. Ds Publikum und öi d'Müsiker heint alli en uhammer Freid kä und heint enander esoo agschteckt, dass das en wunderschööne Üftritt wordu ischt. Merci villmal miine Mitmüsiker und natiirli öi dum fantastisch Publikum. Das ischt eine va miine absolute Häiläits va miiner Karriera gsii!!

Eppis ganz anners ischt natiirli ds Jodlerfäscht ds Luzääru gsii. Ich bi uberraschte gsii, wie iischers Brüüchtum iner Schwiz länger je meh wieder gschätzt und unnerstitzt wird. Mit soovill Lit heint öi die greegschtu Optimischtu nit chennu rächnu. Trotzdem het ds OK das Fäscht jederzit im Griff käh. Eifach sensationell! Ds neegscht Jahr isch de ds Weschtschwizer Jodlerfäscht ds Natersch, wani übrigens ganz sicher niene wärdu Müsig machu - an dem Fäscht tüeni 'numma' fahnuschwingu. Gfrewwu mi scho jetzu druf!

Da hett mich doch z'letschmal en güete Kolleg gfrägt, ob mier das nit verleide, Aabu fer Aabu fer wildfrämdi Lit der Göiggler z'machu. Die Frag het mi gat rächt erschtüünt. Ich machu doch nit der Göiggler und häs glöibi öi nit neetig mich z'verschtellu. Ich bi genau so wieni bi, gibu mich öi eso und hä eifach Freid an dem wani machu! Und ds Allerschönschta: D'Lit wellunt mich öi na zwenzg Jahr Brüefsmüsig immer no engagieru. Das isch doch d'Schönschta a emene Müsiker cha passieru!

Villiichter is der üfgfallu das öi in neegschter Zit wieder vill Üftritta im Wallis wärdunt sii. Fer d'Üsserschwizer: Ich cha nix derfir!! Der wa mich z'eerscht engagiert, dem gahni halt ga spilu. Und das hie im Wallis immer eso vill Lit zu miine Üftritta chämunt, heint öi d'Veraschtalter mit der Zit gmerkt und fräägunt mi jetz scho ganz früeh fer en eventuelle Üftritt. Aber iner Üsserschwiz spill ich ja immer no relativ flissig und naa wie vor gottlos gääru. Das blibt öi so.

Fer dizmal häni wieder gnüeg gschribu - villiichter gseh wier iisch ja bi einum va de neegschtu Üftritta. Hetti en enz Freid!



Mittwoch, 02. Juli 2008 - Eidgenössisch Jodlerfäscht Luzääru

Hä scho eewig lang kei Nius meh gschribu... Aber ds Eidgenössisch Jodlerfäscht ischt eiguntli vill meh als en "Nius"-Itrag wäärt!

Mit esooo vill Lit heint appa öi die allergreegschtu Optimischtu ds Luzääru nicht chennu rächnu. Äs het so vill Publikum käh, dass d'Jodler, Alphorublääser und öi wier Fahnuschwinger fascht unnergangu sind. Trotzdem: Äs ischt uhammer schöön gsii und ds OK het trotz der Uberrumplig va dene ganzu Züschauer d'Situation jederzit immer im Griff kä! Chapeau!!!

Ich gfrewwu mich scho uf ds Weschtschwizer Jodlerfäscht ds Natersch z'neegscht Jahr!



Donnerstag, 03. April 2008 - Nius vam April

Ds Jahr ischt eerscht eppis meh als drii Monat alt, aber was da scho alls gluffu isch, geit in kei Chüehüt drinna. Am 2. Januar hei wier iische Vater, miine Ätti miessu bigrabu. Die ganz Famili isch zwar froh gsii, dass är nimme het miessu liidu - aber äs het trotzdem zimmli weh gmacht. Und dernaa is Schlag uf Schlag witergangu: D'Karin het en Niera vercho. Trotz de ganzu Komplikatione (...leider immer no...) sii wier zwei glicklich, dass das ändlich giklappt het. Und de ischt d'Fasnacht cho, wa mu im ganzu Oberwallis fascht in jeder Bar Z'Hansrüedi (ab Zeedee) keert het. Öi d'Üftritta mit der Gruppa 'Üfheeru!!' heint iisch und öi de ganze Lit Freid gmacht. Zwischudri hei wier no schnäll en niwwi Gruppa gigrindut: 'D'Lüüsbüebu'. Das sind d'A.F. (Allpott Futsch) mit mier zämu. Alles was druber z'brichtu git chamu naaläsu unner www.lüüsbüebu.ch. Apropos Lüüsbüebu: Wier hei äxtra fer d'Fasnacht en Single üfgnu mit de Lieder 'Ich hä Durscht', 'Laftinomeh' und 'Natersch, miis Derfji'. Die Single chamu niene chöifu - aber d'Lieder chamu im Internet unner www.lüüsbüebu.ch gratis ambrichaladu. Üsserdem het die Gruppa A.F. öi am Wettbewerb fer du bescht EM-Fän-Song mitgmacht. Wa schi iru Titul üfgnu heint kä, heintsch ds Lied 'Laftinomeh' no schnäll umgitegschtut und no züesätzlich igäh. Eifach eso us Plausch. Weisch wie wir alli paff si gsii, wa unner dene fascht zweihundert Isändige d'Jury genau das Lied unner d'Finalischtu gwählt heint. Bis zum 6. April löift jetz no d'Internet-Abschtimmig und der Song wa jetzu 'Di Beschtu' heisst, ischt immer no vor der Rockgruppa 'Gotthard'... Ich lah de mich vom Ändresultat la uberraschu. Was aber ganz sicher klappt: Äs git es eimaligs Konzärt zämu mit de ENDFRENZ!! Am 9. Öigschtu z'Gräächu lää wer so richtig los. Fascht zwei Stunde Konzärt mit dum Audi, dum Björn, dum Speedy und dum Dieti. Dr Jorgesch will leider nimme - aber ich hä en Super-Ersatz gfunnu! Lääht che la uberraschu. Das wird uhammer fätzig und luschtig und ich gfrewwu mich scho hittu druf!!

Aber nit nummu uf denu Üftritt darf ich mich gfrewwu: äs verwundrut mich immer wieder, dass ich naa fascht drissg Jahr immer no so sensationell gfräägte und üsgibüechte bi - und das häni bsunners miinum triwwu Publikum z'verdanku! Äs macht mier immer no vill Freid eso derfu üfzträttu - öi wenns in letschter Zit hientamal zimmli stressig wordu ischt - ich bi ja fer ds Fahnuschwingu öi no vill unnerwägs. Züedem hetti ich fer diz Jahr no en niwwi Zeedee giplaanti kä - aber das müessi wohl oder ibul vergässu - fer alls längts eifach nit...

So jetz häni wieder gnüeg gschribu - äs fählt numma no en Mitteilig in eiguner Sach: Va jetz awäg chämunt die 'Z'Hansrüedi-Nius' es bizji sältuner: Numma no zweimal im Jahr. Sasüffi.

Ich winschu dier en schööne Frielig und hoffuntli bis bald!